El-Muiz-zu, El-Mudhil-lu

Ndër emrat e bukur të Allahut është edhe emri El-Muiz-zu, Ngritësi, Ai që përkrah dhe fuqizon robërit e Tij të devotshëm, dhe emri El-Mudhil-lu, Nënshtruesi, Ai që nënshtron dhe poshtëron jobesimtarët për shkak të mosbesimit të tyre.

Këta dy emra të bukur nuk kanë ardhur në Kur’an në formë emri, por kanë ardhur në formë foljeje:

قُلِ ٱللَّهُمَّ مَٰلِكَ ٱلْمُلْكِ تُؤْتِى ٱلْمُلْكَ مَن تَشَآءُ وَتَنزِعُ ٱلْمُلْكَ مِمَّن تَشَآءُ وَتُعِزُّ مَن تَشَآءُ وَتُذِلُّ مَن تَشَآءُ بِيَدِكَ ٱلْخَيْرُ إِنَّكَ عَلَىٰ كُلِّ شَىْءٍ قَدِيرٌ“Thuaj “O Allah! O Sundues i gjithçkaje! Ti ia jep pushtetin atij që do dhe ia heq pushtetin atij që do. Ti e lartëson atë që do dhe e poshtron atë që do. Vetëm në Dorën Tënde është çdo e mirë. Vërtetë Ti je i Plotfuqishëm për çdo gjë.” (Ali Imran: 26)

Nga frytet e besimit në këta dy emra të Allahut

-Ngritja dhe ulja, nderimi e poshtërimi janë në dorë të Allahut xh.sh., Ai ngre e lartëson, fuqizon kë do dhe në anën tjetër ul, nënçmon e poshtëron kë të dojë, askush nuk ka vendim në këtë dhe as që mund të ketë.

-Atë që e ngre Allahu, ai vërtet është i ngritur, është i nderuar e krenar.

-Krenaria e vërtetë nga ana e Allahut për njeriun është ta drejtojë e udhëzojë në Islam.

-Ngritje, lartësim e krenari e vërtetë është kur Allahu e forcon robin në dinin e Tij, ia bën të dashur dinin, farzet e Islamit dhe ia bën të urryera haramet, bidatet dhe çdo gjë që nuk e do Zoti ynë, tebareke ve teala. 

-Muslimani edhe nëse është fukaraja më i madh, prapë është më i pasuri dhe më i nderuari nëse në gjoksin e tij, në zemrën e tij, në shpirtin e tij ka fjalën la ilahe il-lAllah Muhamedun resulullah.

-Muslimanin edhe nëse e ulin të tjerët, edhe nëse e fyejnë dhe e poshtërojnë, ai në fakt nuk është i tillë, ai prapë është shumë i ngritur, shumë i çmuar, shumë i nderuar, se Allahu e ka ngritur, e ka nderuar dhe lartësuar.

-Muslimanin që e praktikon Sunetin e Pejgamberit, sal-lAllahu alejhi ve sel-lem, i cili e praktikon dinin islam, Allahu ka për ta ngritur e lartësuar, ashtu sikurse i lartëson edhe evliatë e tjerë të Tij.

-Ai që e do dinin e Allahut, ai që përpiqet ta përhapë dinin e Allahut, ai që përpiqet ta ruajë dinin e Allahut xh.sh., atë Allahu ka për ta ngritur e lartësuar, madje edhe tek ata që janë kundërshtarë të dinit islam, qoftë edhe pas vdekjes së tij, ka për ta lartësuar punën dhe veprën e tij në këtë dunja, se për botën tjetër nuk diskutohet fare.

-Ata që kanë qenë armiq të Allahut, armiq të evliave të Allahut, armiq të Pejgamberëve e të dijetarëve e hoxhallarëve, Allahu i ka poshtëruar e nënçmuar sa kanë qenë në këtë jetë ende pa shkuar tek Allahu xh.sh., ku do jetë nënçmimi dhe përbuzja e vërtetë. Kjo është e vërtetuar me Kur’an, me hadithe dhe me praktikë, madje edhe sot jemi duke e parë këtë të vërtetë.

-Allahu ka për t’i poshtëruar armiqtë e Tij, të gjithë ata që e kundërshtojnë Allahun, që e luftojnë dinin e Allahut xh.sh., që i luftojnë evliatë e Allahut, ka për t’i nënçmuar e poshtëruar Allahu qoftë edhe pas një kohe, madje qofshin ata armiq edhe mbretër e pasunikë.

-Sigurisht që kush i kupton këta dy emra, nuk kërkon nga askush që ta lartësojë, por e kërkon vetëm nga Allahu xh.sh.. Kjo arrihet duke i rregulluar punët me Allahun, duke e mbajtur dinin e Allahut, duke jetuar me dinin e Tij, me Sunetin e Pejgamebrit të Tij, Muhamedit, sallAllahu alejhi ve sel-lem.