El-Hafidh

Ndër emrat e bukur të Allahut është edhe emri El-Hafidh dhe El-Hafi'idh - Ruajtësi, Allahu është Ai që ruan këtë gjithësi nga çrregullimet, përkujdeset për krijesat e Tij.

Emri El-Hafidh në Kur’an është përmendur një herë në formën njëjës, te fjala e Allahut xh.sh.:

قَالَ هَلْ ءَامَنُكُمْ عَلَيْهِ إِلَّا كَمَآ أَمِنتُكُمْ عَلَىٰٓ أَخِيهِ مِن قَبْلُ فَٱللَّهُ خَيْرٌ حَٰفِظًا وَهُوَ أَرْحَمُ ٱلرَّٰحِمِينَ“...Allahu është Ruajtësi (Mbrojtësi) më i mirë dhe Ai është më i mëshirshmi i mëshiruesve”! (Jusuf: 64)

Ndërsa në shumës ka ardhur dy herë:

إِنَّا نَحْنُ نَزَّلْنَا ٱلذِّكْرَ وَإِنَّا لَهُۥ لَحَٰفِظُونَ“Sigurisht, Ne e kemi shpallur Kuranin dhe, sigurisht, Ne do ta ruajmë atë”. (Hixhr: 9)

وَمِنَ ٱلشَّيَٰطِينِ مَن يَغُوصُونَ لَهُۥ وَيَعْمَلُونَ عَمَلًا دُونَ ذَٰلِكَ وَكُنَّا لَهُمْ حَٰفِظِينَ“Dhe (ia nënshtruam atij) disa nga djajtë që zhyteshin në det për të, (për Sulejmanin, duke nxjerrë xhevahire) dhe bënin edhe punë të tjera dhe Ne i ruanim ata (që të mos shmangeshin).” (Enbija: 82)

Ndërsa emri El-Hafi’dh ka ardhur tri herë në Kur’an:

فَإِن تَوَلَّوْا فَقَدْ أَبْلَغْتُكُم مَّآ أُرْسِلْتُ بِهِۦٓ إِلَيْكُمْ وَيَسْتَخْلِفُ رَبِّى قَوْمًا غَيْرَكُمْ وَلَا تَضُرُّونَهُۥ شَيْـًٔا إِنَّ رَبِّى عَلَىٰ كُلِّ شَىْءٍ حَفِيظٌ“Vërtet, Zoti im është Ruajtës (Mbikëqyrës) mbi çdo gjë”. (Hud: 57)

وَمَا كَانَ لَهُۥ عَلَيْهِم مِّن سُلْطَٰنٍ إِلَّا لِنَعْلَمَ مَن يُؤْمِنُ بِٱلْـَٔاخِرَةِ مِمَّنْ هُوَ مِنْهَا فِى شَكٍّ وَرَبُّكَ عَلَىٰ كُلِّ شَىْءٍ حَفِيظٌ“...Zoti yt është Mbikëqyrës i çdo gjëje.” (Sebe: 21)”

وَٱلَّذِينَ ٱتَّخَذُوا مِن دُونِهِۦٓ أَوْلِيَآءَ ٱللَّهُ حَفِيظٌ عَلَيْهِمْ وَمَآ أَنتَ عَلَيْهِم بِوَكِيلٍ“Allahu është Mbikëqyrës mbi ata që zgjedhin mbrojtës përveç Tij...” (Shura: 6)”

El-Hafi’idh është edhe ai që është i ngarkuar për të ruajtur diçka, për ta mbrojtur, për t’u kujdesur për të, siç na ruajnë ne melaiket .

Hatabi ka thënë: “El-Hafi’idh është El-Hafidh, që është ai i cili i ruan qiejt dhe tokën dhe çfarë ka në to, përkujdeset për to, në mënyrë që të mbeten aq sa duhet të mbeten, që nuk rrënohen e nuk shkatërrohen, siç ka thënë Allahu:

ٱللَّهُ لَآ إِلَٰهَ إِلَّا هُوَ ٱلْحَىُّ ٱلْقَيُّومُ لَا تَأْخُذُهُۥ سِنَةٌ وَلَا نَوْمٌ لَّهُۥ مَا فِى ٱلسَّمَٰوَٰتِ وَمَا فِى ٱلْأَرْضِ مَن ذَا ٱلَّذِى يَشْفَعُ عِندَهُۥٓ إِلَّا بِإِذْنِهِۦ يَعْلَمُ مَا بَيْنَ أَيْدِيهِمْ وَمَا خَلْفَهُمْ وَلَا يُحِيطُونَ بِشَىْءٍ مِّنْ عِلْمِهِۦٓ إِلَّا بِمَا شَآءَ وَسِعَ كُرْسِيُّهُ ٱلسَّمَٰوَٰتِ وَٱلْأَرْضَ وَلَا يَـُٔودُهُۥ حِفْظُهُمَا وَهُوَ ٱلْعَلِىُّ ٱلْعَظِيمُ“...dhe Ai nuk e ka të rëndë t’i ruajë ato (kujdeset për to)...” (Bekare: 255)

-Ai e ruan robin e Tij nga rreziqet, e mbron atë nga kurthet e këqija, siç ka thënë Allahu:

لَهُۥ مُعَقِّبَٰتٌ مِّنۢ بَيْنِ يَدَيْهِ وَمِنْ خَلْفِهِۦ يَحْفَظُونَهُۥ مِنْ أَمْرِ ٱللَّهِ إِنَّ ٱللَّهَ لَا يُغَيِّرُ مَا بِقَوْمٍ حَتَّىٰ يُغَيِّرُوا مَا بِأَنفُسِهِمْ وَإِذَآ أَرَادَ ٱللَّهُ بِقَوْمٍ سُوٓءًا فَلَا مَرَدَّ لَهُۥ وَمَا لَهُم مِّن دُونِهِۦ مِن وَالٍ“Njeriu ka përcjellës (engjëj), para tij dhe pas tij, që e mbikëqyrin (e ruajnë) atë me urdhrin e Allahut...” (Rread: 11)

-U ruan njerëzve veprat e tyre, ua përmbledh ato, ua tubon, ua di çfarë kanë edhe në gjokset e tyre, asgjë nuk i ikën Atij, asgjë nuk i fshihet Atij.

-I ruan evliatë (miqtë) e Tij, kujdeset për ta që të mos bien në gjunahe, i ruan nga kurthet e shejtanit, në mënyrë që të shpëtojnë nga sherri dhe fitneja e tij”.

E përgjithshme, që është përkujdesja (ruajtja) e Tij për të gjitha krijesat, pastaj të lehtësuarit e asaj që ua ruan jetën, duke arritur atë nga e cila varet mbijetesa e tyre, ua ruan konstruktin e tyre, i udhëzon drejt asaj që kanë dobi, siç ka thënë Allahu:

قَالَ رَبُّنَا ٱلَّذِىٓ أَعْطَىٰ كُلَّ شَىْءٍ خَلْقَهُۥ ثُمَّ هَدَىٰ“(Musai) tha: “Zoti ynë është Ai që çdo gjëje i ka dhënë trajtën (formën) e vet e pastaj e ka udhëzuar”. (Ta-Ha: 50)

E veçantë, që është përkujdesja e veçantë e Allahut për robërit e Tij, është ruajtja e evliave të Tij përpos asaj që u cek më lart, i ruan ata nga çdo gjë që ua dobëson imamin dhe ua lëkund bindjen në Allahun nga dyshimet (shubhet) e ndryshme, nga sprovat (fitnet), nga epshet (uni), i nxjerr të shëndoshë prej tyre me kujdesin dhe ruajtjen e Tij ndaj tyre. I ruan ata nga armiqtë e tyre nga xhinët dhe nga njerëzit, i ngadhënjen ata ndaj tyre, ua largon kurthet e tyre. Allahu ka thënë:

إِنَّ ٱللَّهَ يُدَٰفِعُ عَنِ ٱلَّذِينَ ءَامَنُوٓا إِنَّ ٱللَّهَ لَا يُحِبُّ كُلَّ خَوَّانٍ كَفُورٍ“Allahu, në të vërtetë, i mbron besimtarët...” (Haxh: 38)

Nga frytet e besimit në këtë emër të Allahut xh.sh.

Sigurisht që frytet e besimit në këtë emër të bukur të Allahut xh.sh. janë të shumtë, ndër ta veçojmë:

-Të pasurit parasysh lartmadhërinë e Allahut xh.sh., ngase kur njeriu e kupton se asgjë nuk mund t’i fshihet Allahut xh.sh. dhe se Ai ia ruan atij çdo detaj, çdo fjalë e vepër, pastaj ia paraqet Ditën e Kiametit dhe e llogarit në bazë të tyre, atëherë ai duhet të jetë i kujdesshëm në fjalët dhe veprat e tij.

-Mbështetja, tevekuli i vërtetë në Allahun sepse Allahu është ruajtës dhe mbrojtës i vërtetë, ndaj kush ia kthen shpinën Allahut, atëherë Allahu e lë atë, kurse atë që e lë Allahu, ai shkatërrohet, humb dhe askush nuk ka mundësi ta ruajë më.

-Veprimi i shkaqeve, sebepeve, për të të mbrojtur Allahu xh.sh., më e madhja e të cilave është:

a) veçimi i Allahut me adhurim, forcimi i lidhjeve me Allahun, veprimi i veprave, i punëve të mira dhe largimi nga të këqijat. Kjo është pjesë e hadithit:

“Ruaje Allahun, të ruan ty Allahu, ruaje Allahun, do ta gjesh pranë vetes...”

b) Gjëja më e rëndësishme që kërkohet nga njeriu pas tevhidit është falja e namazit, siç ka thënë Allahu xh.sh.:

وَٱلَّذِينَ هُمْ عَلَىٰ صَلَوَٰتِهِمْ يُحَافِظُونَ“...dhe të cilët i kryejnë rregullisht faljet (kujdesen për namaze).” (Muminun: 9)

Kush e ruan namazin, ka për ta ruajtur Allahu në dunja dhe në ahiret. Ai ka për të qenë në kujdesin dhe mbikëqyrjen e Allahut sa të jetë në këtë botë dhe pasi të shkojë në botën tjetër, Allahu ka për t’ia ndriçuar zemrën, fytyrën, varrin në Ditën e Kiametit. Allahu ka për t’ia lehtësuar çdo vështirësi, ke për ta bërë të jetojë i qetë, i kënaqur me caktimet e Allahut, i mbrojtur nga haramet, nga intrigat dhe kurthet e çdo armiku nga njerëzit dhe xhinët.

c) Bërja e duave që Allahu të na ruajë neve dhe familjes sonë dinin dhe dunjanë, siç ka bërë dua Pejgamberi, sal-Allahu alejhi ve sel-lem, dhe na ka mësuar edhe ne si të lutemi. Ndër ato dua janë:

“...O Zot, më ruaj mua nga para, nga pas, nga e djathta, nga e majta, nga lart dhe kërkoj nga Ti të më ruash që të mos sulmohem befas nga poshtë meje...”

Më ruaj, o Zot, nga të gjitha anët!

-Falënderimi i Allahut natën dhe ditën për të mirat e shumta me të cilat na ka begatuar, por edhe që po na i ruan këto të mira, po na ruan të mirat e dinit tonë, po na ruan imanin, Kur’anin, fenë tonë nga çdo devijim, po na ruan ne si muslimanë nga çdo e ligë.

Allahu na ruajt nga çdo e ligë, amin!